سنه اولى

بسم الله الرحمن الرحيم

هذي السنه موادها مشتركه لكل تخصصات كليه الطب المساعد واجباري تاخذون كل المواد الي راح احطها , خل نبدي نقول المود شنو مع شرح بسيط لكل ماده .

الأحياء  Biology101:

الماده جدا حلوه وماتحسون فيها شي يديد, مكونات الخلايا الحيوانيه النباتيه , الانقسامات الخلويه, التنفس الخلوي , وفيه اول شي عن الكيميا البسيطه والبروتينات وسوالف خفيفه حلوه. الماده فيها مختبر والمختبر هم مافيه شي مثل الثنوي تشوفون خلايا تحت المجهر وتفرقون بين الانقسامات ومن هالسوالف.

الكيمياء  chemistry 110_:

راح تسمعون تهويل لي الراس عن هالماده وانها صعبه ومحد يعديها من اول مره وان عديتوها ماراح تييبون قريد قوي ...كله كلام بكلااام ..الماده ابدا مافيها تعجيز ولا اشياء من المريخ. تتكلم الماده عن مبادئ كيميائيه بسيطه اولا مثل حساب الكتله والحجم و و بعدين عن الاحماض والقواعد و انواع المركبات والروابط الايونيه. والماده هذي بعد لها مختبر والمختبر منفصل عن الماده يعني تاخذونه بروح مو مثل الاحياء بنفس الماده. وهم المختبر سهل وحلو ومافيه اي صعوبه.

الفيزياء  Physics 121:

 تتكلم هالماده عن حسابات السرعه الخطيه والدورانيه وانواع الطاقه مثل الساكنه والشغل واشياء ثانيه نفس الي ماخذينها بالثنوي.وايضا الماده لها مختبر وحلو المختبر تقيسون سرعه وحجم واشياء ثانيه سهله.

English 181+182:

اذا كان عنكم تمهيدي لازم تاخذون ماده انجليزي 180 اول عشان تقدرون تاخذون الباجي. في وايد ناس متخوفين من الانجليزي بالكليه مع انها مواد سهله حيل وسهل ان تييبون فيها قريدات عاليه. نفس الثنوي الماده فيها كلمات-قرامر-فقره عليها اسأله- تعبير.. ماده182 فيها التركيز عالكتابه اكثر لكل بشكل عام هذي اساسيات الانقلش. حفظوا الكلمات, فهموا القرامر, عرفوا شلون تقرون فقره بسرعه وتطلعون منها الزبده, تدربوا ع كتابه تعبير حلو ومرتب , وبس مبروك الA

ماده اختياريه:

ضروري تختارون الماده الاخياريه الي تبونها تكون سهله وعند دكتور زين عشان ترفع معدلكم وماتتعبون فيها, ماراح احط لهم اسماء مواد او دكاتره لاني مو مجربه الا ماده وحده وماكان اختياري زين, ف انتو سألوا عدل وكذا شخص عن الماده الي تبون تسجلونها

اسعافات اوليه First Aids:

هذي الماده يديده بديله لماده مدخل التخصصات الي خذوها دفعتي وكل الدفعات الي قبلي, الماده تتكلم عن شنو تقدرون تسوون بعده مواقف مثلا حوادث حروق صدمات ومن هالسوالف , اشوف ان الماده حلوه ومفيده خاصه انها تعلمكم ع كلمات ومصطلحات طبيه  ف تعطيكم خلفيه بسيطه وحلوه تبلشون فيها السنه الي بعدها

الرياضيات المنتهيه Finite:

ماده مثل الاحصاء فيها معادلات ومسائل تحلونها بدون اله حاسبه موصعبه ابد بس انا شخصيا ماكنت احب هالماده بسبب عدم استخدام الاله, وايد اييبون فيها قريدات حلوه.

.......................

سنه اولى سنه فيها احباط وايد, تدشونها وانتوا خايفين ماتدرون وين الله قاطكم و تكونون حاطين توقعات عاااليه وتخيب كلها , تحسون ان المفروض تكونون عارفين كل شي من اول يوم وتمسكون كل المواد عدل من اول كلاس وتفهمون كل شي , وهذا حيل غلط.. ترا عادي تحسون نفسكم ضايعين وعادي تحسون ان في ضغط وايد وعادي تقومون كل يوم ودكم تكملون نومكم و ماتداومون و ودكم تسحبون اوراقكم اليوم قبل باجر .بس تدرون شنو الي موعادي؟ ان تسمعون لاصوات الاحباط بمخكم, موعادي تردون البيت وتسكرون كل شي وتنامون وتقومون ثاني يوم ع نفس الحال, موعادي ماتسألون وماتستفسرون عن كل شي ماتعرفونه, موعادي تأجلون كل شي لين ماتلقون له وقت وموعادي انكم تستسلمون وتتخلون عن احلامكم بدون ماتحاولون, نصيحتي لكم طلبه سنه اولى ..لاتخافون اذا حسيتوا نفسكم ضايعين ولا تترددون دقيقه تسألون الدكاتره او الطلبه عن  اي شي موعارفينه وتبون تتأكدون فيه, شيلوا نفسكم بسرعه عشان ماتتأخرون وايد وتكونون ماشين صح مع المواد والدراسه,, وصدقوني بتكون سنه اولى سنه عجيبه وفيها تكوين صداقات وايد وضحك وايد وانشالله قريدات حلوه.. بالتوفيق.