Anatomy علم التشريح

بسم الله الرحمن الرحيم

راح اتكلم عن اهم المواد الي راح تاخذونها بالكليه ك طلبه علاج طبيعي..علم التشريح (اناتومي) هذي الماده اهي الي تبين الاخصائي الشاطر عن الموشاطر , اهي اهم شي والاساس الي لازم نحفظه ونفهه قبل كل شي. عشان جذي عندنا اناتومي1 و اناتومي2 والحين راح اتكلم عنهم اثنينهم

اناتومي1

راح تاخذونها بسنه ثانيه كورس اول وراح تكون ماده مشتركه بينكم وبين كل تخصصات الطب المساعد+ الصيدله, راح تدرسون بدايه من مكونات الخليه لي جميع اجهزه جسم الانسان وكل جهاز تقريبا يشرحه لكم دكتور, بما ان اسم الماده علم التشريح ف مهم تعرفون اسماء الاعضاء واجزائهم ومواقعهم . لهالماده مختبر, تروحون المشرحه يوم بالاسبوع وراح يشرح لكم جراح على مجسمات او جثث كل الاشياء المهمه الي خذيتوها بالكلاس الي قبله. امتحانات الاناتومي1 النظريه كلها اختياري وامتحان المشرحه يكون جنكم رايحين سينما, تقعدون بكلاس وجدامكم بروجكتر ويحطون لكم صوره وعليها سهم وانتوا لازم تكتبون اسم الشي الي السهم مأشر عليه بورقه جدامكم بدقيقه بعدها يطق جرس وتتغير الصوره وهكذا لين تخلصون الامتحان..ولاتحاتون يمدي الوقت. النوتات تكفي الدراسه بس اذا تبون كتب حييل حلوه للاناتومي بحط صوره كتاب عجيب للاناتومي + اطلس صور حلو وواضح

اناتومي2

راح تاخذون هالماده بسنه ثانيه كورس ثاني واهي ماده تخصص يعني بس انتوا الي تاخذونها, راح تكونون مخلصين اناتومي1 وماخذين خلفيه عامه عن اجزاء جسم الانسان بس موبشكل كافي ان تصيرون اخصائيين علاج طبيعي , عشان جي اناتومي2 ماده مهمه حيل مو عشان المعدل والدرجات عشان مستقبلكم ,راح تاخذون فيه تفاصيل اكثر عن اجهزه الجسم, وراح تاخذون فيه اهمم شي العضلات (اساميها, من وين تطلع ووين تدش, شنو الاعصاب الي تغذيها) العظام وتفاصيل ادق عنها, وهم عندها مشرحه كل اسبوع, امتحانات النظري نفس اناتومي1 كلها اختياري بس الفرق اهو بامتحان العملي ماراح يكون نظام السينما, راح يكون نفس امتحان البايولوجي , ستيشنات مرقمه وكل ستيشن يكون فيه مجسم وسهم وتكتبون اسم الشي الي مأشرين عليه بالورقه وكل ماتسمعون صوت جرس تروحون للرقم الي وراه. راح احط صوره كتاب حيل فادني بهالماده

.................

حاولوا وانتو تدرسون هالماده ماتعاملونها معامله ماده بعديها وخلاص, لان هالماده بالذات اذا ماحفظتوا وفهمتوا من الاول راح تواجهون مشاكل بجمييع مواد التخصص الي بعدها, وموفقيين يارب