إجراءات التوظيف في وزاره الصحه (للكويتيين)
بسم الله الرحمن الرحيم السلام عليكم, اولاً ألف مبروك
التخرج واسأل الله ان يجعلكم خيره للوطن وأن يجعل بايدكم الشفاء للمرضى, ثانياً
اجرائات التوظيف تتختلف للكويتيين ولغير الكويتين (سواء ابناء الكويتيات و غير محددين
الجنسيه او اي جنسيه ثانيه) وراح اشرح لكم كل الاجرائات الي سويتها للتوظيف.
قبل لا نتكلم عن اجرائات الوظيفه خل نتكلم عن جم شغله مفيده بشكل عام لفهم مجال التوظيف لتخصصنا وطبيعته
1-شنو جهات العمل الي تقبلنا؟
الصحه,الدفاع والداخليه,القطاع الخاص,النفط,جامعه الكويت,التربيه,الشؤون الاجتماعيه والعمل
2-جم معاشنا؟
المعاش الاول يبلش من 1107 بسنه الامتياز(لان بدوون بدل الخفاره) ومعاش اول للتوظيف 1100
3-شنو المسمى الوظيفي الاول؟
ممارس مبتدأ علاج طبيعي
4-متى وقت الخفاره؟
يومين بالاسبوع او على حسب القسم وعدد الموظفين الي فيه
5-شنو اهي ساعات العمل الرسميه ( البصمه)؟
من7:30 لي 1:45
6-جم مده سنه الامتياز؟
سنه كامله-52 اسبوع
7-وين راح اروح بسنه الامتياز؟
مستشفى واحد عام(انتو تختارون 3 ويختارون واحد منهم)+ المستشفيات التخصصيه
8- شكثر راح اضل بكل مستشفى؟
التقسيمه على اساس التخصصات
كارديو (قلب ورئه) = 11 اسبوع
اورثو(عظام) = 11-14 اسبوع
نيورو (اعصاب) = 13 اسبوع
بيدز (اطفال)= 8 اسابيع
اونكولوجي (الامراض السرطانيه) = 3 اسابيع
حروق = 3 اسابيع
صحه مرأه = 3 اسابيع
الحين نتكلم عن الاجرائات ,اول شي هذي اهي الاوراق اللازمه للتوظيف ونصيحه طبعو 10
نسخ من كل شي احسن لكم وروحوا الوزارات مبجر عال8 ونص عشان اغلب الاماكن تبطل 8
ونص وعشان تلقون مسافط سنعه
ملاحظه: ماتحتاجون ورقه التأمينات اذا ماكنتوا موظفين من
قبل .
اول خطوه:
تروحون لديوان الخدمه المدنيه عشان تطلعون كتاب الترشيح,
اول شي تروحون لصاله استقبال المراجعين وتسحبون من جهاز سحب الارقام من رقم 4 الى 8
بعدين تعطونهم نسخه من البطاقه المدنيه والشهاده العلميه بعدين تردون تختارون
رقم13 وتعطونهم الرقم المدني وبعدين( مو كل مره) يطرشونكم الدور الخامس لرئيس
الاختصاصيين عشان ينزل لكم طلب حاجه من وزاره الصحه وتردون نفس الكاونتر رقم13
عشان يطبعون لكم الترشيح (لاتنسخون منه الحين لان راح تطبعونه بوزاره الصحه مع
تواقيع) وبجذي تكونون خالصين من الديوان ومستعدين انكم تروحون وزاره الصحه .
ثاني خطوه:
تروحون لوزاره الصحه وتقدمون لهم طلب الترشيح عشان
يطبعونه بعدين تنسخون منه 5 نسخ وتردونهم لهم مع كل الاوراق الي ذكرناها فوق
ويعطونكم 4 اوراق تعبون فيهم بياناتكم , بعدها يعطونكم3 كتب (كتاب للأدله الجنائيه
والبصمات-كتاب لاداره العلاج الطبيعي والتدريب- كتاب للفحص الطبي) وراح يقولون لكم
دشوا بعد يومين ثلاث اونلاين عشان تسوون التراخيص الطبيه. بعد ماتستسلمون الكتب
لازم تتوقع من 3 اماكن بالوزاره نفسها بعدها تطلعون من الوزاره عشان تسوون ال3 كتب
وتردون اخر شي للوزاره.
ثالث خطوه:
انصحكم تسوون كتاب الادله الجنائيه والبصمات بنفس اليوم لان
ماراح يطول كلش, روحوا اقرب جنائيه لمنطقتكم او اي واحد كيفكم معاكم كتاب الترشيح
وصوره شخصيه , يعطونكم ورقه وتوقعونها من رئيس القسم وتكونون خالصين.
رابع خطوه:
تروحون المجلس الطبي تعطونهم الكتاب ويعطونكم 3 اوراق (لفحص
الدم,لفحص تكرمون البول, ولأشعه الصدر) وبعد لازم تكونون مطعمين لفايروس الكبد
الوبائي (لازم تييبون ورقه من المكان الي طعمتوا فيه دليل انكم مطعمين مع تواريخهم),
تحليل الدم يسوونه لكم بنفس المكان بنفس الوقت وتطلع نتيجته بعد يومين وبعدين روحوا
المستشفى التابع لمنطقتكم عشان تسوون تحليل تكرمون البول و الاشعه. بعد اسبوع ودوا
معاكم نتايجكم واستلموا تحليل الدم وراح تسوون فحص نظر وتدشون عن الدكتور وبعدين
يعطونكم ورقه شهاده لياقه بدنيه وانكم جاهزين للوظيفه .
خامس خطوه:
تروحون عند اداره خدمات العلاج الطبيعي وتعطونهم كتابكم ويسوون
لكم مقابله قصيره يسالونكم فيها عن نقاط قوتكم وضعفكم و وين رحتوا خلال الكلينكال
بالجامعه ويعطونكم كتاب عشان تودوه للصحه بعدين, طبعا راح تردون للاداره بعد ماتخلصون
كل الاوراق اللازمه من وزاره الصحه عشان يرتبون لكم جدولكم التدريبي.
سادس خطوه:
لازم تسوون لكم تصريح طبي اونلاين من موقع وزاره الصحه,
الخطوات سهله تسوون لكم حساب بعدين تعبون المطلوب ولازم تحطون صوركم وبطاقتكم
المدنيه و ورقه الطلب (راح احط الورقه تحت) لازم تعبونها وتحطونها, بعدين يبيله جم
يوم على مايطلع بعدين يطرشون لكم رابط تدفعون50 دينار بعدين تنطرون بعد ولمن
يقولون لكم خلص تروحون اداره التصاريح الطبيه وتستلمون تصريحكم.
سابع خطوه:
تروحون وزاره الصحه وتعطونهم الاوراق هذي (التصريح الطبي,
تقرير اللياقه البدنيه, ورقه الجنائيه, كتاب اداره العلاج الطبيعي) بعد ماتسلمون
الاوراق يقولون لكم روحوا قسم العلاوات عشان تستلمون تقرير المعاش بعدين تودونها
قسم التوظيف و ويقولون لكم تعالو بعد10 ايام تستلمون قرار التعيين (ملاحظه:تطلع ابجر
بوايد من 10 ايام جيكوا عليهم بعد اسبوع)
ثامن خطوه:
تردون وزاره الصحه وتستلمون قرار تعيينكم , راح يطلبون
منكم تنسخونه وتوقعونه بغرفه 2و 1 وتردونه قسم التوظيف بعدين يعطونكم كتاب تودونه
لاداره العلاج الطبيعي
تاسع خطوه :
تروحون اداره العلاج الطبيعي عشان تسلمون كتابكم وتقعدون
مع استاذه خديجه الرامزي عشان تسالكم جم سوال وتعطيكم مذكره اسبوعيه وبعدين تقول لكم
عندكم شهر من تاريخ التعيين عشان تباشرون عمل وبعد ماتختارون تاريخ توظيفكم راح
تقول لكم راح نكلمكم عشان نعطيكم جدولكم وهويتكم وبسسس الف مبرووك الوظيفه وموفقين
بسنه الامتيااز وعساها سنه جميله وكلها ايام سعيده وخبرات عجيبه
ملاحظه: بعد سنه
الامتياز راح تروحون قسم النقل والتثبيت وفي خطوات وايد بعد تسونها عشان تتثبتون
بالوزاره رسمي .. باذن الله اذا الله احيانا وخلصت سنه الامتياز مالتي ع خير احط
لكم كل الخطوات الي سويتها... دعواتكم الطيبه
ورقه الترخيص :
تعليقات
إرسال تعليق